Surface 3 ，相對於 Surface Pro 3 黎講佢雖然規格比較入門，不過價錢更加親民，亦都更加輕身，加上原生就已經係 Windows 8.1 系統而唔係 Windows RT ，呢一代既 Surface 3 終於算係實用唔少啦。其實呢部機已經係香港可以預訂啦，早訂仲有贈品！定價 $3,888 起你地又點睇？
係近幾年，其實大陸廠都推出唔少平價既 Windows 平板，最平去到 $2,000 有找（甚至 $1,000 有找都搵得到，但規格好入門囉），相對之下唔少大廠既 Windows 平板都性價比不夠高，唔知呢部 Microsoft 既親生仔又可唔可以挽回一成呢？佢採用 10.8 吋解像度 1,920 x 1,280 屏幕，不但支援 10 點觸控，亦支援到原廠 Surface 手寫筆，處理器方面採用 Intel 的 Atom x7 1.6GHz 四核處理器，會推出 64GB SSD 配 2GB RAM 和 128GB SSD 配 4GB RAM 版本，亦有 350 萬像素前鏡頭與 800 萬像素主鏡頭，官方指出續航時間有 10 小時播片。
同大陸平板唔同既係 Surface 3 強調造工方面，採用左鎂合金作為主要材料，亦有 Surface 自家 Kickstand 支架設計，可以調到不同角度去睇片、進行文書工作，雖然厚 8.7mm 不是誇張，但重量去到 622g 絕對是同級比較笨重的一部機。當然買機會有一年免費的 Office 365 個人版，除左大家常用既 Word 、Excel 、PowerPoint 之外亦有 Outlook、OneNote 等軟件，而一年之間亦有 OneDrive 無限雲端空間。
價錢上，64GB 配 2GB RAM 版本賣 HK$3,888；而 128GB 配 4GB RAM 版本定價是 HK$4,688。大家可以加 $1,048 去換一個超薄身的 Type Cover (實體鍵盤保護蓋），而係網上 Microsoftstore.com 或者指定的零售商例如蘇寧、豐澤、衛訊預訂就會送一支價值 $408 的 Surface 專用手寫筆，當然就係數量有限送完即止。
